Chris van der Westhuizen

Gedigte en Gedagtes

Besoekers - Totaal: 76530

Liewe Jesus

Ek as groot man het geen krag,
het geen oorwinningsmag
sonder U genade nie.

Ek wat dink ek weet alles
weet in werklikheid maar niks...
maar ‘n druppel in die stormreën.

Ek wat elke dag so selfversekerd
opstaan asof niemand my kan knak...
bly op my knee in aanbidding sak.

U wat my vyande verbruisel,
my werk soos 'n speletjie laat voel...
Op U vertrou ek volkome, Liewe Jesus.

U wat my behoefte ken...
U gee aan my in oorvloed,
nog voor ek kon dink om te vra.

‘n Pragtige vrou het in my
'n belangstelling gevind,
en is met my in die eg verbind.

'n Mooi kind het U ons gegee;
'n Blonde blou-oog meisiekind
het rustigheid in ons arms gevind.

'n Huis, gesondheid en klere
en uit die kombuis lekker geure.
My beker loop behoorlik oor.

Talente waarmee ek kan woeker
om te kan sorg vir vrou en kind.
Liewe Jesus, U is my goedgesind.

U is my rots en steunpilaar.
U genade ken geen einde nie.
Dankie vir U onmeetbare liefde.

Nederig en dankbaar sal ek bly.
Tot in ewigheid...
Amen.

                              Chris M. v/d Westhuizen '2005

Lys van Gedigte